सुनसरी, १७ माघ, प्रहरी टोली माथि गोली फायर भएपछि प्रहरीले जवाफी कारवाही गर्ने क्रममा गोली लागेर मोरङ टंकिसिनुवारी–७ बस्ने २९ वर्षीय श्रवण सरदार, मोरङ नोचा–२ बस्ने २७ वर्षीय सतन पासवान र सुनसरी ईटहरी उपमहानगरपालिका–१३ बस्ने ४२ वर्षीय सुभलाल सरदार घाइते भएका छन् ।

प्रहरीले उनीहरुको साथबाट मेड इन युएसए अटोमेटिक पेस्तोल लोड सहित २ थान, कटुवा पेस्तोल २ थान, चक्कु १ थान, कोरेक्स ३ बोतल, डाईजेल्याप र फेनारगन ८ पाकेट समेत बरामद गरेको छ । इटहरी उपमहानगरपालिका–१४ स्थित खनार नहरमा विशेष सूचनाको आधारमा को।२२ प ६३६३ नम्बरको मोटरसाइकललाई सोमबार पच्छयाउने क्रममा मोटरसाइकलमा सवार उनीहरुले सादा पोसाकमा खटिएका प्रहरी माथि गोली प्रहार गरेर भाग्ने प्रयास गरेका थिए । 

प्रहरीले जवाफी फायर गर्दा खुट्टा र तिघ्रामा गोली लागि घाइते भएका उनीहरुलाई पक्राउ गरी उपचारको लागि धरान घोपा अस्पतालमा पठाइएको प्रहरीले जनाएको छ ।